الجاهل بالتاريخ

عمركم شفتوا الشباب الألماني نازلين الشارع يعملوا فوتوسيشن بلبس جيش الإتحاد السوڤيتي، برغم أن الجيش دا كان سبب في القضاء على النازية إللي عانى منها الشعب الألماني ؟
عارفين كام امرأة و فتاة ألمانية تم إغتصابها على يد الجنود الروس و الأمريكان بعد القضاء على هتلر و قواته ؟
هل من الممكن تتخيلوا الجزائريين و هما عاملين حفلة مثلاً لابسين فيها ملابس الأرستقراطيين الفرنسيين برغم لغتهم اللي تأثرت كثيراً بالإحتلال الفرنسي ؟

عارفين كام جزائري تم قتلة و قطع رأسه و حرقه و ذبحه و كم طفلة و امرأة تم إغتصابها أمام أهلها و زوجها قبل أن يتم بقر بطنها و كم قرية جزائرية تم محوها من الوجود بالأسلحة الكيماوية الفرنسية ؟
متخيلين مشهد من الأثنين دول ممكن يحصل ؟ متخيلين طيب أن لو حد فكر يعمل كدا ممكن يحصل فيه إية هناك من الناس نفسها ؟
من يومين مجموعة من الشباب السكندري نزل الشارع و عمل فوتوسيشن بملابس الرومان في أماكن عامة. مش هاقول اللبس و البنات و البتاع. سيبكم من دا كله. لا هاقول حاجة واحدة بس ... أنتوا فاهمين عملتوا إية و مين الرومان دول ؟
عارفين أن الرومان دول إللي بنوا المعابد و سابولنا آثارهم عملوا إية في أهل مصر الأقباط علشان يغيروا مذهبهم و يؤمنوا بمذهب قيصر ؟ عارفين الأعداد المهولة من الأقباط الأرثوذوكس إللي اتعذبوا على يد الرومان و اتسجنوا و اتقتلوا و اتحرقوا و العذاب اللي كانوا بيشوفوه من قطع أطرافهم و إطعامهم للأسود و النمور و نزع ألسنتهم من أفواههم و حلوقهم و حرقهم و إغتصاب نسائهم و صلب رهبانهم و حرق كنائسهم لأنهم مش عايزين يؤمنوا بدين قيصر ؟
عارفين أن الأقباط كانوا بيحفروا تحت الأرض علشان يبنوا دور للعبادة يمارسوا فيها طقوسهم خوفاً من بطش الرومان اللذاذ الكيوت إللي نزلتوا لبستوا لبسهم و اتشبهتم بيهم و اتبستطوا أوي كأنه تاريخ برَّاق و جميل ؟
أنتوا فاهمين أن إللي عملتوه دا لو حكيتوه لواحد من أبناء الدول المتقدمة إللي نفسنا نبأى زيها أقل حاجة هايعملها هو أنه هايستحقركم في سره ؟
هل وصل بينا الجهل إننا نفرح أوي بحضارة كانت مصدر عذاب و آلام و قتل و ذبح للمصريين و نقول الله إية الحلاوة دي !!! ...
فرق كبير جداً بين إننا نزور المتاحف الرومانية و نشوف حضارتهم العمرانية و الحضارة المدنية إللي بنلاقيها في بقايا ملابسهم و أدوات طعامهم و حضارتهم العسكرية في الأدوات الحربية إللي كانوا بيستخدموها و بين إننا نلبس لبسهم و ننزل نعمل فوتوسيشن في الشارع كأننا فرحانين بالحقبة السوداء دي إللي كانت سبب في مآسي غالباً مفيش شاب واحد ولا شابة من إللي في الصور يعرفها.
الجاهل بالتاريخ عمره ما يبني حضارة.
معلومة أخيرة مهمة : يا ريت ماتنسوش توضحوا للبنات إللي كانوا بيتصوروا و المعجبات بالصور أن المرأة في الحضارة الرومانية كان بيتم النظر إليها بكونها مخلوق من الدرجة الثانية و بكونها بنفس درجة الحيوانات و ماكانش لها وضع في المجتمع غير على سراير الرجال مش أكثر. دا مش تقليل مني بشأنها لكن هو دا كان وضعها في الحضارة إللي أنتوا نزلتوا الشارع تتصوروا بملابس أهلها.
اسكندر الأكبر الكيوت راضي عنكم في تربته.